Ausflug Seniorinnen 7. September 2017


Du hesch für uns, liebs Nelly – e Daag organisiert,

in unsry schöny Bärgwält – wo uns het fasziniert.

 

Nach BLT und SBB – denn mit em Poschtauto,

het so ne 4-er Gondle – dr letscht Teil übernoo.

 

Doch vorhär dien mir z Flüele – am See e Kaffy nää,

es het ganz frischy Gipfeli – und Mandelgipfel gää.

 

Doch churz zrugg zu de Gondle – die sin fänomenal,

die faare nur per Telefon – fascht oony Personal.

 

 


 

 

 

Mir laufe Richtig Arnisee – und underwägs wird gässe,

s bschtellt eifach jedes was es will – mir sin gärn zämme gsässe.

 

 

 

Dr Rundgang um dr Arnisee – dä chönnt nit schöner syy,

e wunderbary Ussicht – und d Sunne schyynt drbyy.

 

Nach eme Halt im Alpeblick – dien mir in d Gondle schtyyge,

in där hän acht Persone Platz – wo me dörf yyne-byyge.

 

Und zrugg uf sichrem Boode - chunnt s Poschtauto scho bald,

dr Zug faart denn vo Ertschfäld – zu unsrem letschte Halt.

 

Nei, s git no ganz e churzy Faart – dr Zääner bringt ys hei,

wo mir denn im Schtaziöönli – no öbbis dringge wei.

 

Bi mmer gueter Schtimmig – sin vill Lachdräänli gflosse,

mir hän s vo Därwil bis uf d Alp – und retour numme gnosse.

 

Nadüürli chönnt y vo där Reis – au no chly mee verzelle,

doch han y, wäg em Dateschutz – das halt nit mache welle.

 

Es het dä schtressfrei schöny Daag – uns eifach rundum gfalle,

drum chunnt dr Dangg, liebs Nelly – im Name vo uns alle.

Lotty

 

 

Zu den Versen von Lotty gibt es wie üblich nichts mehr hinzuzufügen.
Danke vielmals! Es war ein wunderbarer Tag und auch Petrus hat es sehr gut mit uns gemeint!
Der Organisatorin, Nelly Seinige, nochmal ein herzliches Dankeschön !
Wir freuen uns schon heute auf die nächste Turnfahrt im 2018!

Prost zusammen
Ines